wanhoisecret
patreon
「炸兩教室」第四堂！
🕑 Added 2019-11-25 04:12:58 +0000 UTC區議會選舉完咗啦，大家要上堂啦！尤其是啱啱當選嗰啲素人唔該唔好走堂！
要知道每一次選舉完咗之後，都會有大量市民同埋選舉相關嘅人士發現好多問題出現，所以若果根據機制去玩就要好小心啦！若果你玩得呢個選舉機制，你就要認同呢個投訴機制，唔係你可以落堂啦！😂
首先每次選舉，監察同接受投訴嘅架構都係選舉管理委員會，而每次選舉日前後45日內，都會設置一個投訴機制，包括電話、Fax，最重要係投訴組別。
我再講清楚啲嘅意思就係話，你若果發現今次區議會選舉有任何嘅問題出現，無論係反應意見定係作出投訴，係會有個限期：就係選舉日之後既45日之內，針對呢次區議會選舉來講，就係2020年1月8號之前要作出所有嘅意見反映及投訴，否則之後你講乜都冇用亦都冇投訴機制再俾你，呢個就係香港選舉投訴嘅玩法！明唔明白！
所有相關投訴嘅熱線、傳真以及投訴隊伍，係2020年1月8號之後就會取消晒㗎啦！當然你作出投訴之後等待佢哋調查同回覆，好多時候係會超越1月8號呢個限期，但呢樣野唔影響調查同投訴工作，只要係限期前作出投訴，選舉管理委員會就必須要立案記錄以及處理！
咁投訴有幾個方式，可以直接打去28277251（1 月8號之後將會取消）向相關同事講晒你想表達嘅意見或者投訴，記住索取投訴編號。
或將相關表達同投訴傳真至25111682（1月8號之後將會取消），選管會同事將會回覆你。
又或者email到eacenq@eac.hk （此電郵長期運作）
當然有一個更加直接嘅方法，而且係我常用嘅方法，就係直接去到選管會現場作出投訴；咁我啱啱都打完電話俾選管會問得好清楚，以往我直接上去同佢地同事面對面講低投訴記錄係要預先預約，但而家唔使啦，直接喺辦公時間上去搵同事做投訴就得㗎啦，會有同事詳細抄低你嘅意見同埋投訴，之後再會比份影印本你！
當然有好多人唔願意浪費呢啲時間，但係我係絕對願意！無論你認為呢啲投訴有冇用，作出記錄慢慢調教，點都改變到一啲！若果你直接上去，留意以下事項，相關地址係：香港灣仔港灣道二十五號海港中心十樓，辦公時間係上晝九點至下午六點，但1:00至2:00午飯時間冇人工作請注意！不過都係要提多一句係2020年1月8號之後你就算親身上到去都唔受理相關今次區議會選舉嘅意見及投訴㗎啦！
要做野就唔好等！要學識做炸兩就唔好再阿吱阿咗！ok？！落堂！
Comments
可以出書叫炸兩教室或者炸兩俠的自我修養😂😂😂😂
炸兩好波😆
Kat
Thank you sir!
Goodbye sir.
Benjamen Wong
一定要俾個like你👍
炸両俠萬歲😂
Thank you, sir.
本人真心膠，到底點解炸両俠乜都識? 佩服佩服!
等咗個炸兩教室好耐
