wanhoisecret
patreon
有些人根本就不應該做父母
🕑 Added 2020-05-09 01:13:31 +0000 UTC尋日我要去睇住兩個手足細路去西九龍法院上庭，琴日都講過真係安排混亂情況惡劣激到我生蝦咁跳，而且審訊過程荒謬，呢樣野我慢慢先同大家講，反而我好想講啲手足細路嘅家長！
過去九個月我夠膽講我真係做足㗎啦！而且我本身身體又唔係好其實真係有時會好透資，其實我身邊好多朋友到而家都唔明點解我要咁幫果啲細路，其實除咗埸社會運動運動需要大家為正義而戰之外，其實若果你真係識得前線好多細路，你都會好震驚，其實大部份都係有相當嚴重嘅家庭問題，所以我身邊照顧嘅好多細路，其實啲家人係從來都唔理佢哋㗎！於是乎好多就我比生活費佢哋啦、請佢哋去食飯啦、帶佢哋去睇醫生啦、其實最重要就係俾啲愛佢哋！
好似琴日其中一個被重新拘捕嘅仔，其實對於一般人來講佢家庭係非常非常之好，家境富裕，喺新界係住豪宅㗎！而且自細讀書一流，係有天姿嘅高材生，IQ超過160.......但父母其實從來唔理佢！當佢第一次被黑警旺角被無理拘捕，佢父母第一件事唔係去關心佢，而係覺得好冇面影衰自己，因為一個係資深公務員、一個係法律界資深人士！咁佢第一次保釋完之後出嚟同我講嘅第一件事係父母係佢一被拉嘅時候就決定經濟封鎖佢，所以需要我俾錢佢生活！我話絕對冇問題！之後佢係自己去搵法律顧問意見、自己去搵律師、自己去換自己需要嘅律師，父母都冇理過佢！真係好痴線！再提多次大家佢得10幾歲！
到佢第一次踢保成功，由於佢自己都熟讀法律，佢真係得十歲咋喎，知道六個月內其實係會被簡易治罪條例再被拘捕，結果早個禮拜真係被預約再拘捕啦！
咁琴日正式上庭，我先第一次見到佢父母到場旁聽！其實我都驚訝呢兩個咁冷漠嘅家長會肯放低自己工作過嚟！但我都係太天真，我琴日8:00之前去到就已經幫佢打聽上庭嘅正式位置因為呢幾日好混亂，佢父母理都冇理過啦當然，最離奇係當審到完，佢出嚟要處理保釋情況，佢父母只係同佢講左一兩句，就話要走啦！甚至連同我打招呼一句都冇，之後就係我同佢哋嘅仔出去食飯（當然係我俾錢！）之後陪佢返法院處理晒所有保釋程序先至送佢走！呢啲竟然唔係父母應該做嘅嘢咩？！而最終離開嘅時候我都忍唔住同個細嘅講佢父母對佢都幾冷漠！之後個仔終於忍唔住同我講：「其實第二次拘捕，係佢哋兩個陪我去警局搞保釋，喺度等嘅時候，兩個都覺得浪費自己時間，一個就不斷上網睇人哋啲狗話好得意，另一個就不斷話要返屋企佢放自己隻狗！其實真係冇理過我㗎！」聽到嗰句都好心酸！之後個仔仲安慰返我：「我自細都係被放任自由㗎啦！慣咗㗎啦！」
我真心覺得有啲父母係唔應該生仔！唔識教仔唔識照顧細路你咪生啦！
當然我有啲朋友話其實你唔應該幫人哋照顧細路囉！唔關你事囉！或者sorry！都係巨蟹座累事，我忍唔住喎！我尋日七點幾去到下晝三點幾我真係好撚攰！
Comments
係你哋有緣，冇得話唔應該幫人照顧個仔。佢父母似乎當初都係唔想生細路，似係意外生咗佢，所以一直無對子女的愛心。而佢亦靠這個緣份才能出生，這生要經歷，命中約定有你的愛。一起感恩。
雲海 多謝你🙇🏽
養狗好啦！做乜生一個出嚟害佢呢😡
有冇野我地幫到手呀？我無仔女，亦自知唔會係一個好父母，寧願幫呢d手足～
即刻諗起以前吴彦祖拍嗰套片，臨尾响會展新翼頂拍嗰場戲，佢做警隊高層個老豆向住佢跑住屌，話呢個仔無鬼用/垃圾~ 我身邊都聽唔少老豆老母唔會理仔女嘅事例，所以早兩晚忽然聽番陳百強啲歌，嗰首"念親恩"，其實對好多人嚟講，同小說情節無分別。
藍屍來架啦，點可以用常人嘅標準
有啲人係根本做人都唔配
哩D父母垃圾都不如
我真係好嬲呢個世界好多人唔關心自己小朋友咁點解要生，好多又唔識教，真係唔理解點解要生
做人都要考牌
感激雲海一直支持手足。衷心感謝
雲海 多謝你🙇🏽
生仔要考牌同年檢
唔緊要啦！雲海 , 感謝您關心及幫助啲手足。最基本佢哋有良知 , 知道誰事誰非 , 至於佢哋呢啲父母 , 唔見棺材唔流淚 , 到死嗰一刻才會回想自己係原來有仔女 , 最終生仔係想有人幫自己送終執手尾。
多謝您，雲海。 有好多藍藍都係面子大過天，身同感受。
知識多，不等於人品好。返學無教。
可能對父母都唔知點解自己會生仔
Thanks for your help Wan Hoi, Not so many people like you to help them.
睇完後， 我覺得個細路好似比佢家長更懂事更無懼面對一切……好彩 還有雲海熱心人幫助 !
只會生孩子, 但不懂要愛䕶. 難得孩子這樣成熟和堅強. 幸而香港還有你和這些孩子, 我們很感激.
Thx海，我做家長既，都好頂吾順呢啲家長！
真係好多父母識生唔識教，勁多未婚生左又唔理，好慘😓
其實生小朋友真係要考牌（掩面
真係好心痛 虎毒不吃兒 人比猛獸更恐怖
根本好撚多父母就平時已經唔撚理個小朋友 以為有錢就咩都搞得掂，養大佢令佢有得食好住好就已經係好父母 (e.g.我老母) 然後一有咩事俾人拉咗就一定係話個細路唔啱出嚟搞事 (e.g.更甚者如我老母咪會好大聲話大家係暴徒，開槍射死你地就啱) 隻狗仲緊要過人嘅叫佢自己生隻狗出嚟啦 要小朋友做乜？ 有啲所謂父母(包括本人老母)根撚本應該直接reboot過人生，佢地連做人都冇資格 話其實你唔應該幫人哋照顧細路 > 大佬你見到個小朋友盪失路你都問吓點幫到佢返屋企啦 個細路你話曳就唔抵幫啫，乖嘅幫係好應該 你話個小朋友係十歲唔係廿歲喎 其實十歲(就算冇咁高IQ)已經好清楚自己屋企係點 話慣咗同冇事都係唔想人地擔心 但係個小朋友有你關心佢會感激你一世
有好多家長根本就唔應該做人😣🤬🤬🤬🤬
我公司前前後後嚟咗幾個手足嚟幫手, 個個都係有屋企等於無屋企, 有一個的父母直頭年頭掉低咗個仔返咗強國就冇理過佢, 個細路要自己搵錢食飯仲要交埋水電煤管理費, 匪夷所思......
我覺得似做少少戲俾大家睇咁囉！
多謝雲海。其實有唔少人為生而生 ... 時間到被屋企催，咪結婚咪生囉 ...
咁佢兩個黎旁聽做乜春？癡線
藍屍父母真心相信外國勢力喺背後搞鬼策劃，所以佢哋係會拆得掂。估錯咪賴對方利用完年輕人過橋抽板囉。
多謝你，雲海，幫手照顧班小朋友。個d父母生個小朋友出嚟，唔關心佢愛護佢，唔配做人父母......真係好心酸😔
好心酸
我估兩公婆嘅父母都冇理過佢哋，不過讀咁多書都唔識關心愛護子女，高學識又搵到錢有鬼用咩！
多謝你，雲海，我明白你認唔住既心態，我都係巨蟹座，都會甘。加油💪天在看，對得住自己，唔好理其他人點講。
好多謝雲海幫小朋友!!
只要有少少良知都會覺得痴線....有D人唔好講係小朋友.....家人朋友都唔配有.......
雲海，好多謝你咁幫啲細路
