wanhoisecret
patreon
尋日去眼科醫院激到我火滾
🕑 Added 2020-08-18 05:59:32 +0000 UTC（長文慎入）我真係忍唔住要講下琴日我去眼科醫院點解比佢哋激到生蝦咁跳！
話說因為疫情，原本五月複診我就唔敢去啦，咁佢哋就寄咗張下一次複診紙比我，係2021年3月！OK冇問題，而家啲眼都穩定，不過問題就嚟啦，因為我青光眼眼藥水用到八月尾就冇晒啦！當然我唔可以理所當然認為佢哋電腦睇到啦，咁於是乎我就主動打電話問佢哋我可唔可以淨係嚟攞藥啊？眼科醫院職員好清楚同我講，你可以嚟到見一見護士長之後就可以攞眼藥水㗎啦！咁為免麻煩我事先都打聽，其實萬寧係可以買到呢隻眼藥水，我係唔介意俾貴價買，但係都係需要醫生紙！
咁琴日我去中九龍診所抽完血，咁就順便去隔離眼科醫院攞眼藥水啦諗住！
一去到，首先要去詢問處攞個見護士長嘅籌，行咗去等咗半個鐘，入去見護士長，第一句唔係關心我任何病情，佢係第一句問我：「見我哋係要比診金㗎你OK 㗎可？」我話OK！佢繼續講：「咁就得啦最緊要呢樣野！」我當時心裏面已經著著地！我好有耐性解釋比佢聽我青光眼眼藥水用晒啦！個護士長查完一大餐電腦，之後話不如你攞住四個月眼藥水，幫你提早到12月複診啦，我都話冇問題！我仲以為即刻幫我搞掂添，個護士長就話啦你攞住份嘢出去正門口再重新排隊預約複診期之後再返嚟我呢度！
於是乎我就走番去門口排隊重新預約複診期，排排下我覺得唔對路問職員佢話你排隊預約複診期都要攞籌㗎 ！咁我又去攞多次籌再用左20分鐘排隊改複診期！
再返返去護士長嗰邊，個護士長見都唔見我，就叫出邊個職員叫我俾咗診金先！嗰$80診金係咪真係咁重要啊！比完診金我諗住去攞藥啦，點知佢職員又俾另一個籌我去另一個房間等見醫生！吓！見醫生，又話見完護士長可以攞藥！ OK OK OK！見就見啦！
我又用咗20分鐘等見醫生，一入到去，醫生問我叫咩名，明顯見到佢覺得自己賴嘢，佢好騰雞咁講：「那等陣先！唔好意思！唔好意思，」我當時諗咩事呀，個醫生竟然話：「你用開嗰隻青光眼藥而家醫管局冇晒，幫你換兩隻要日夜用嘅新藥俾你！」我即時話唔OK ！有用開青光眼眼藥水人都知，呢啲眼藥水係要試有冇副作用，你有冇可能求其換俾我呀？！醫生喎！我就同醫生講：「你不如出張醫生紙比我，我唔介意自己去萬寧買嘅我問咗㗎啦！」個醫生竟然可以問個護士，「我哋可唔可以出醫生紙叫人買㗎？」之後佢話要查一查叫我出邊再等！WTF！再等咗15分鐘，醫生又係唔見我，叫個護士比張醫生紙我話可以啊你自己走去買啦！
我屌你老味！你醫管局一早知道自己根本就冇咗呢隻眼藥水你使唔使叫我返嚟攞啊仲要搞咁大龍鳳，嘥我咁多時間！我就即刻攞住張醫生紙去萬寧買啦大佬！你知唔知道我眼科醫院攞呢四支眼藥水係$60 ，我喺萬寧買係2300多元！不如你一早寄張醫生紙比我自己去買唔使我又嘥時間晒心機晒精神晒體力啦！當然我亦都諗緊咁其他青光眼病人冇咁有錢嘅點算！話俾你聽琴日嬲到爆！
Comments
一定要堅持投訴！做小手術都咁冇醫德又冇品，大手術隨時會死人
換大陸或者有回佣嘅藥 🤔
可能同大陸比
似係菜鳥醫生
有次同我阿媽去睇急症，見到啲其中一個醫生好以做到厭世咁，死吓死吓又求鬼其；另一個响隔離嘅就寸柒柒，同啲病人講嘢好似審犯咁，跟住見佢洗手，拉咗起碼廿張抺手紙（我真係望住佢數住）出嚟抺手。 其他普通門診科嘅更加係古怪on9應有盡有，同意樓上講，去公立醫院係攞藥，唔係診治。
可能係藍絲，知係你就特登玩你
根本醫療系統已墮落十幾年，但啲人仲讚口不絕，好似好完美世界第一咁
唉 我老婆都係公醫做 佢話醫管局明知有啲好啲既藥可能係貴幾蚊甚至幾毫 但係副作用可以少九成 都唔肯比醫生用 睇見啲黑警 每射一粒催淚彈 可以夠個病人用幾個月無副作用既藥 其實啲醫生好心痛
其他青光眼病人無雲海咁有錢就會用咗公立醫院隻新藥😔
醫生係本地人？
九龍好多箹房，都無睇我醫生紙，買血壓藥如是。
首先每人血糖可升可跌，果時驗到有糖尿，但之後食藥係可以好返或控制到，所以個醫生未必錯哂，正常糖尿藥斷藥後副作用會慢慢無，不用擔心
係政府唔泵水去醫管局，所以成日轉啲平藥
我個仔係醫院食開果隻藥又係轉過三次，理由又係該款藥短缺之類，唔知關唔關近年的美中關係事呢
話說我媽咪睇骨科每次覆診前都要驗血，上年無端端個醫生睇完驗血報告話我媽有糖尿要食藥，跟住今年再去覆診時個醫生(當然係唔係同一個醫生，專科就係衰在每次見嘅醫生都唔同)問媽咪：「你冇糖尿喎，點解會開左藥俾你?」我媽返嚟講番一肚氣，佢仲因為無端端有糖尿唔開心左成大半年，啲糖尿藥都唔知有咩副作用，真係唔知而家所謂專科醫生個資格點得番嚟.......好嬲好嬲好嬲好嬲好嬲好嬲......\_/
似乎醫生出左事喎, 係咪香港醫生?
我都係有青光眼，三個月就去明愛覆疹，成日受D阿姑啊護士氣架。其實佢哋都有出粮啫⋯⋯
青光眼藥水屬於專科藥物，要有醫生簽字先可以出藥單，所以要你見醫生，衰就衰在護士長唔同你講返個程序上佢無權開專科藥姐。
就係因為佢哋係尖子，好多嘢行政文書，佢哋都冇接觸，開口就有人跟。所以咪出現呢啲情況。
呢班响香港做得醫生既都係嗰D好有抱負既尖子狀元，有乜理由連少少既admin procedures 都唔記得要問返護士架?
Benjamen Wong
公立醫院嘅醫生大部份淨係識睇症，其他同行政相關嘅嘢，好多時要問護士先知有冇權做同要點樣做，所以一啲都唔出奇。（利申：有超過10年經常出入分科診所及醫院經驗）
可以想像我喺現場個突仲大！我原本想問：醫生你第一日返工？！
我公立醫院開刀，要局部麻醉，屌佢老味，一路傾電話、同護士講是非、又鳩噏又剩咁，我都火火地，專心小小好唔好。 之後掛住鳩噏，嗰支辣雞跌咗落去我心口度，屌，痛到我個人彈起，即刻開佢波，之後就梗係好唔憤氣咁啦！ 結果縫針叫我一星期後先再去洗傷口，咁我一星期後就去洗啦，一拆紗布，護士即刻屌出嚟。 原來特登縫到好似梁朝偉個潤腸咀咁，護士都話無人會咁做！ 投訴兩次都石沉大海。嬲到震😡🤬
「我哋可唔可以出醫生紙叫人買㗎？」聽到呢度打撚咗個突，系統性神經病，成個system啲人都發花癲
睇公立係唔簡單既事，病人用幾個鐘係換到藥返去，而唔係治療。
