wanhoisecret
patreon
有些事好心痛又不能理解
🕑 Added 2020-08-28 00:23:48 +0000 UTC有些事只能在patreon 表達一下......昨天最傷心的事，莫過於證實11個後生手足比大陸公安捉晒！當中包括之前被國安法拘捕嘅李宇軒！
其實早幾日已經有傳說，李宇軒係幾日之前大陸嘅緝私行動中被捕，去到琴日朝早，喺香港嘅傳媒界開始證實事件屬實！
當我收到呢個消息嘅時候，我感到很悲傷亦都很憤怒！容許我慢慢解釋發生乜事，首先差不多早四個月，我哋絕大部份傳媒界嘅人，都已經收到風，去台灣走佬嘅路線已經完全曝光，香港納粹政府知道、中共知道，手足唔可能在採用呢條路線離開香港㗎啦！其中消息指，部份蛇頭甚至食兩家茶禮，收完呢邊錢，轉個頭就賣消息比中共捉人，聽聞事件都發生過唔少㗎啦，只係被捉嘅人因為冇知名度冇人理過囉！
所以過去幾個月，無論係傳媒界，或者朋友向我打聽相關訊息嘅時候，我都一而再再二三表達唔可以咁樣走佬㗎啦，第一根本係一條自尋絕路嘅死路，第二蛇頭收一個已經絕對唔合理嘅價錢，而且已經變成呃錢行業，我相信有啲朋友都聽我勸了！
加上上個月，有不少傳媒朋友都收到一些不認識的人的短訊，詢問出走台灣的資訊，大家就更加警覺！
所以奇就奇在李宇軒同呢10個手足點解會選擇其實佢哋自己都知黃晒嘅路線逃走啦？！所以琴日傳媒界之間熱烈討論緊，到底係邊個安排，又好似冇人認識，甚至傳媒界所詢問嘅蛇頭當中，冇一個認頭！成件事就更加奇怪，有二五仔？對家設立嘅局？但李宇軒本身都應該知道呢條路線已經唔可能！
當然事件發生咗啦，除咗係一個警示話比所有後生仔唔該醒少少之外，就係傳媒之間到底應唔應該報道，或者詳細報道呢件事？！報道外界又話你爆佢哋資料，唔報道又話你唔將呢件咁重要嘅事話比其他人聽！報道又死唔報道又死！
最終，琴日朝早都係由相對局外嘅自由亞洲爆曬出嚟，先至引發香港其他傳媒爭相報道（其實所有香港傳媒星期三已經收到晒消息㗎啦，所以琴日PK鄧話自己完全唔知你真係可以完全唔信）
四個月前我已經講到明呢個時勢唔係可以咁樣走，起碼留喺香港，大家都睇住先，而家好啦11個手足被送中，以後就可以人間蒸發㗎啦，就算一兩年後先知發生乜事，都俾人打到人唔似人啦！
所以成件事我既悲傷又憤怒！大家同中共鬥真係唔該醒少少，純良如鴿子，靈巧像蛇呀！
Comments
陰謀論: 會唔會係國安喺香港捉咗佢地, 然後放風話係喺公海截獲?
:'(
我都好心痛, 有無唸過走, 離開傷心地, 係第2度日後再戰
諗起雲海之前都提過,前排頻頻出現既海上浮屍好可能係逃跑既手足被蛇頭推落海…加埋依家依D新聞,睇親都好難過
Dash Cheng
真係好心痛。。。。
四個月已經冇人唔知路線黃咗㗎啦！安排果班好奇怪
😭條路黃咗就要多啲手足知，如果唔係仲多人受害
好心痛😭😭😭😭
究竟有咩連禽獸都不如嘅人會去連走緊嘅人都要追殺，一個已不適合人類居住的地方
KarenSze YAU
洗頭艇屈偷渡？
其實呢件事令我覺得自己人可能已經有25/卧底😔
唯有集氣希望佢地最後平安返黎🙏🏻🙏🏻🙏🏻
T
其實一大班人一齊走路係幾奇怪。 正常唔係一兩個一次減低風險？
30年前班黑社會有些少道義，而家邊會有呢支歌仔唱
講就話係黃左走路果條路線捉到，事實就係有二五仔⋯⋯ 為錢出賣，捉痛腳，甚至警黑
又或者「洗頭艇」後直接放風訛稱由捉偷渡捉到⋯
其實四個月前已經有人話popo扮蛇頭啦！
或者 police 扮蛇頭⋯
可能11個人中，其中一個就係「扮兄弟」。
Ever Future
我偏向相信所謂嘅「走佬」只係喺香港被捉然後送上船格硬屈佢地偷渡，再正式喺海上被中共捉一次。
