wanhoisecret
patreon
當年洛杉磯奧運會場外
🕑 Added 2020-09-05 06:07:15 +0000 UTC由於1984年暑假，當時12歲嘅我就跟住阿媽返咗美國屋企住咗兩個月，簡直係改變我人生概念，乜原來世界嘅另一邊係咁樣生活！若果要講晒兩個月嘅嘢有排寫，所以我pin point 一個小故事寫寫！
其實係因為頭先喺櫃桶發現返呢份當年喺現場攞返嚟嘅影印宣傳品，竟然留咗36年（我都話我係儲物狂），就令我想返起當日奧運襟章的故事！
1984年喺洛杉磯奧運會舉行日期，嗰兩個月正正係奧運會舉行期間，啲歡樂同慶祝氣氛真係濃厚到你唔信，真係與民同樂囉，唔係政府自己樂囉！
要知道當時無論主會場有冇比賽進行，主運動場外面嘅公園空地都會每日接近18小時滿晒前來慶祝嘅遊客同美國本土人，當中大家其中一個最大娛樂活動就係關於奧運襟章pin！所以若果你見到張宣傳單張第一個字，係當時好盛行嘅一個英文新字：「pinformation」襟章情報！（宜家呢個英文字消失咗啦）
講返少少背景先，其實每一屆嘅奧運會，都會有唔同單位製作唔同類型嘅襟章，包括商業機構、產品、政府部門、運動員、甚至私人單位、組織、協會等等等等！
當時我同母親同兄長差唔多一兩個禮拜就會去現場逛，在場人士分成幾類型，一部份係襟章愛好者，大家交換情報資料，第二部份係搵到心頭好同人哋交換pin嘅活動，第三部份就直情係售賣來自唔同地區嘅襟章！
我仲好記得因為由於當年中國係第一次重返奧運會，只要你身上掛上一個中國國旗嘅官方奧運pin，就會有人想請問你賣唔賣呀？當年我身上就有一個，真係中國政府出嘅奧運襟章，我當然唔賣啦，因為我本身都係儲襟章嘅人！而當年呢個中國襟章係俾人炒到聽聞超過$1000美金！
當然最值錢嘅除咗中國襟章之外就係運動員自己國家嘅襟章！甚至開始到後期係唔理三七廿一唔關奧運會事但係靚嘅襟章都開始有人賣，包括我哋係做藝術品生意嘅人，母親就將一個銀做嘅熊貓立體襟章掛係我頂帽，我印象中好似賣咗三個，印象中好似$50美金一個！
所以當時呢場奧運會外牆真係好好玩，去到最後嗰個禮拜，直情你見到啲人係攞住個手提信用卡機，可以現場碌卡買襟章，真係痴線得好緊要！當然襟章風潮可以話係每一屆奧運會之後就會回到谷底！若果係純炒賣嘅人就會損手，但對於我來講我真係儲pin儲咗20幾年冇影響，真係20年前先開始冇再儲！但早幾個月去日本嘅時候我喺當地都忍唔住買咗好多個東京奧運襟章！
Btw我身上面嗰個中國奧運襟章，當年係中國駐美領事館送俾我二舅父，之後送俾我嘅，真係而家唔記得咗擺咗係邊！😂
Comments
係閉幕禮
北寒諜戰?
中國領事送比你二舅父 會唔會係偷聽器黎?
仲有見UFO經驗呢！
