wanhoisecret
patreon
從天能說說電影本身
🕑 Added 2020-09-11 03:03:08 +0000 UTC我想借電影天能去講吓電影呢樣嘢！其實你睇完明唔明白個故事，講真正如導演喺訪問裏邊透露根本唔重要，觀眾自己諗乜就諗乜，去feel下！一言驚醒夢中人！
電影本身就係第八藝術，咁入戲院睇場戲，其實只不過係欣賞件藝術品，而唔係去睇個故事，因為世間上唔係每個故事大家都理解到（過去一年香港發生嘅事大家就更加明白）！
諗返轉頭，其實我睇戲都係feel嘅咋，都係從來都當件藝術品去睇嘅咋！細個入戲院或者睇明珠930又或者後來狂租雷射碟睇電影，根本從來都唔理邊個係導演邊個係編劇，甚至有時連演員都唔理叫咩名，好多時就係純粹靠感覺鍾唔鍾意套戲！就算鍾意套戲，都可能係成套戲一兩個畫面、角色一兩個表情、一兩句台詞，牽動着自己嘅心靈或思緒，就已經決定鍾意咗套戲，就好似天能，飛機撞入機場爆炸，我覺得好震撼幾鍾意，仲要唔係電腦CG；烏克蘭歌劇院挾持人質放毒氣，由於係我研究當年莫斯科劇院同類事件又感到好有親切感；個特工同個侍應講佢飲Diet Coke同自己好似，又覺得好有共鳴！咁就夠㗎啦！明唔明個故事真係唔係太重要！
原本每一套戲就係一個花費好大嘅藝術品，有人鍾意有人唔鍾意；正如有人對清朝乾隆御用茶杯好有興趣，有人覺得完全冇感覺，就完！根本冇得比較㗎！
今次對於天能呢件藝術品，我覺得幾滿意！「請問呢套電影可唔可以打包？」「Of course not！」自己入場睇啦！
Comments
💞
睇完套戲先check係邊個導演，原來係拍inception既導演
講出重點，牽動到自己嘅心靈或思緒，就已經決定鍾唔鍾意套戲。又或者好唔好睇。
睇完之後成頭問號，不過好欣賞導演將未來同現在出現喺同一個畫面嘅拍攝手法
準備再睇
哈哈，見你有好評啦😆
睇戲都係好個人感受，feel 到咩咪咩，最攪笑見到有人鬧d影評人識唔識評戲架，寫到咁，其實寫戲評真係冇咩 準則，都係佢自己既感受姐，唔buy咪唔好理佢囉，依家仲要鬥快明唔明部戲😅放鬆d啦香港人💪
Hagrid
所以套戲出來網上勁多解讀，分分鐘解讀時間仲長過套戲，都覺得好無謂，個魔術好睇米好好欣賞咯，點解係都要追根究底係點樣變嘅呢
要不要加個 hashtag #曲到明？
