wanhoisecret
patreon
一間疑似保安局控制中心
🕑 Added 2020-11-26 02:07:16 +0000 UTC早幾日睇完戲經過尖沙咀麼地道金域假日酒店地舖，見到呢間舖頭終於「結業」，我就想講一個故事比大家聽！
你知道上年場社會運動發生之後，無論香港警察部門、保安局、隱形嘅政治部、甚至大陸嘅情報部門，都有小隊喺香港蒐集情報等等！呢一樣野，對於我來講一啲都唔陌生，只不過係冇諗過佢哋竟然會派人去跟蹤我嗰下離奇！
當時應該係大概10月尾11月頭，我身邊好多人都已經俾人跟蹤，多數都係黑警或者保安局，所以我自己特別小心！某一日中午，我去完中間道郵政局，真係行咗幾步，我就感覺到有人喺後邊跟蹤同監視我，當然我亦都懷疑自己係咪太過敏感，於是乎就走去其中一棟大廈轉角停咗喺度，就係等待有冇人喺後邊跟我，好快趣，就見到一個女人亦都轉入去跟我，但佢諗唔到我已經企咗喺度望住個入口，佢打咗個特，望一望我，即刻扮冇嘢繼續向前行，嗰個女人嘅打扮係一個所謂清潔工人拉住一個大型嘅吸塵機，但係太過造作啦，同埋佢實在唔認識尖沙咀啲樓宇結構，呢個入口行到盡頭就係行人路嘅另一個出口，佢除非真係呢幢大廈工作，否則佢係唔會轉入嚟，於是乎我喺後邊就跟住佢，果然不出我所料佢冇入到呢幢大廈任何一個地方，亦都明顯地佢假扮裝作冇事，繼續出咗行人路向前行！
反跟蹤都係我拿手好戲，我就後邊吊住佢，一直跟着佢，直到佢拖住個吸塵機入咗金域假日酒店裏便間地舖我喺出邊望住佢，佢上咗2樓，咁我就知道原來呢間鋪係偽裝嘅，於是乎我就長期監視呢間舖頭，係售賣新型行李篋，但真係由上年11月到今年暑假，我從來都冇見過任何一個客人喺裏面出現過，反而每次我經過我就特登望住裏面幾個夥計，或者假裝望吓啲行李篋，當然見到佢哋啲神情係相當古怪，亦都從來冇任何一個職員會出嚟招呼我，我當時諗搵日我就玩大佢，行入去買行李篋順便上2樓睇吓，結果我都未玩，間舖頭已經消失咗啦！
所以我都幾肯定話俾大家聽，喺香港呢個被譽為國際情報中心嘅地方，尤其是上年社會運動開始，大把舖頭都係偽裝！
Comments
你小學已經識跟踪人啦,點夠你玩😂
上年5月任達華係呢個位拍過愛國廣告 唔肯定呢間鋪定係隔黎Rolex 但肯定呢兩間其中一間 我係附近拍緊其他戲 因為識劇組某啲人 黎探班 佢地話拍緊愛國宣傳廣告
我成日突然掉返轉頭行
得閒扮下跌野行返轉頭執，挷鞋帶，上左車臨關門一下突然落車，扮傾電話行行下停喺度都可以擺脫到有人跟蹤
雲海，有冇興趣做導演？可以用嚟做電影橋段喔🤭不過笑完又覺得好悲哀.......
《無間道》嘅傻強話齋：總之個嗰人做緊一樣嘢，但係好唔專心咁望住我哋，個嗰就係差人
太刻意
所以係假舖
「清潔工人拉住一個大型嘅吸塵機」呢個打扮做跟蹤都好有笑片 feel
睇番 google 街景，呢間行李篋舖頭又冇舖名，賣啲篋又冇 show 價錢牌，舖裡面連篋嘅牌子名都冇喎，唔似係賣嘢囉，display only 都會 show 個 牌子名俾人知道吓吖！
就於間諜電影橋段一樣
