wanhoisecret
patreon
致一衆辭職區議員
🕑 Added 2021-07-12 08:52:47 +0000 UTC我考慮咗一陣，我都係想寫一篇文章俾近期辭職嘅區議員，可能有好多人會覺得係廢話，但我都決定同大家講講我嘅想法！
無論係以前定係前年區議會選舉，我都同唔少認識或者唔相識嘅有興趣參選人表達過，要決定從政，呢一步要考慮得好清好楚，絕對唔係一份普通工作，亦絕對唔係一份虛榮任務，係政治！係政治呀！
你第一步行入咗政治呢個範疇，你原則上一世都逃離唔到，你嘅個人家人親人所有人都會牽涉在內，唔好咁天真！但可惜嘅係，呢兩個禮拜我見到原來絕大部份嘅人都係咁天真！佢哋好似突然間如夢初醒，忽然覺得政治壓力推到埋身，Come on ！我之前成日同朋友講，你第一步行入政治圈其實你係預咗要死！好明顯絕大絕大部份人係冇諗過參政要死！天真到一個點！
好啦，我都尊重嗰啲決定辭職所謂逃避政治打壓嘅行為（其實根本就逃避唔到）但見到佢哋辭職後嘅反應，我更加失望更加無言以對！包括好多辭職後嘅前區議員，表達怕服務唔到街坊，收到街坊嘅求助已經開始拒絕支援等等等等！我都唔知應該好嬲定好笑！
認識我嘅人都知道，我表達過自己從不參政！因為我係一個好謹慎嘅人，若參政就預咗死，所以我唔會隨便行呢一步！但縱使我冇參政過，唔代表唔可以服務地區市民，過去30年，我全部用自己簡單普通市民身份，處理過幾多地區問題、交通問題、政府政策問題、同地鐵人員同政府人員開過無數個會議，進行冇數個投訴以及要求改善冇數政策，我從來都搵唔到任何一個藉口去唔處理我想處理嘅問題，但竟然見到一個二個啱啱先辭職嘅區議員，裝扮到好似已經服務唔到市民一樣，我開始有啲嘔心！
我想提醒一衆辭咗職嘅區議員，從來服務市民係唔需要「區議員」呢個銜頭！過去30年我做到嘅，我唔信你哋做唔到！依家更加冇呢個包袱可以盡情跨區幫全港市民處理地區問題、政策問題等等！可唔可以唔好俾自己一個咁大嘅政治藉口呢？！
提你地多一次你的辭職唔代表政權會唔對付你！真係咁難理解咩？一日政治，一世政治！
陳雲海2021年7月12號
Comments
lok
正確 正確
而最擲地有聲的是雲海你講得出做得到！
+1 係做事都會綁手綁腳
普遍香港人係呢幾年先開始接觸政治，要佢地短時間內有俄羅斯反對派或者墨西哥政客果種覺悟，係困難
佢地有d真係真•中下階層，無可能好似做議員咁全職幫市民，唔亂做承諾都合理嘅🥺 不過未必安全又真
不為名、不為利，用自己金錢、時間去做一啲對公眾有利，但係自己冇任何得益嘅事，其實有幾多人做得到。
認同！ 有一些舊議員，就算當期唔係議員身份，依然服務市民。 宜家新人係為義氣（啖氣）而做議員。 +家人早已唔係香港住。
香港去到咁唔需要再苛責。佢地係天真又好，單純又好，佢地既付出都值得尊重。去同留都係佢地既決定，受既苦只有佢地承擔，旁人其實連批評既資格都無。
根本呢班大部份都係冇政治智慧及觸覺嘅人黎 以為好易做就去參選
以前d人叫你參政你全部say no 你話入左去人就會腐化，希望我無記錯😅
我理解三少嘅 view. 👌🏼
