DanOnTheMove
patreon
新手篇：乜嘢係 flow-vis❓｜一日一 F1｜第三季（28/30）｜Patrons限定
🕑 Added 2024-02-14 13:00:15 +0000 UTCF1 練習或者冬測期間，最多人問嘅問題之一就係呢個 topic。我每次都係答：flow 就係 airflow，vis 就係 visualisation。然後，下次大家再問（哈）。
咁即係我答得唔夠清晰。
OK，flow-vis 係一種螢光油，係車隊搽落㗎 F1 車、用嚟收集氣流數據，斷定氣動力表現嘅重要工具。啲油係用螢光粉溝油開嘅，車手出車前、班手足會搽、或噴啲油落㗎車度，一係整落頭剷、或者側箱、甚至係成個單邊，又或者係後面成個 diffuser 等等。
搽幾多 flow-vis 落㗎車度都係學問，太多就會積埋一齊、太少又收集唔夠有用嘅數據。
Flow-vis 可以協助工程師斷定戰車氣動力表現，係因為當 F1 車手出去飛車嗰陣，啲仲濕嘅油就會被氣流帶動，飛到去理論上由工程師之前設計好、車身嘅唔同位置。啲油乾咗之後就會有條線，效果就好似風洞測試咁。
呢啲 flow-vis 線係好重要嘅數據，因為可以令工程師明白架車嘅 surface flow 同氣流走向。例如：螢光油搽咗落頭剷底，就可以睇吓啲氣流實際飛咗去邊。同時，亦可以了解架車轉向嗰陣，氣流其實係點飛法㗎呢❓
當架車返入車房之後，氣動力工程師就要趁抹走啲油之前影好曬相。最過癮嘅係，有用嘅 flow-vis 線有時用肉眼係睇唔到嘅，一般只可以用高解像度嘅相先至分析到。有時，車隊甚至會用一種特別嘅螢光油、呢種螢光油係要用紫外光先睇到嘅，咁對手就分析唔到佢哋嘅數據。
至於點分析呢❓主要係比較 flow-vis 數據同 CFD/wind tunnel 數據之間嘅「異數」。例如：氣流喺邊度斷開（airflow separation），唔 correlate。氣流分離，即係氣流偏離戰車表面、變成亂流、增加阻力、降低穩定性、減少下壓。透過比較 flow-vis 線，氣動力工程師就可以釐清有無同有乜問題、繼而搵出點解、最後改正。
完
第三季《一日一F1》都係 30 篇。如果有興趣重讀前兩季另外 60 篇嘅話，㩒下面個 tag 或者 content search：一日一F1。
Comments
隱形油？😂
Edward Wong
唔知遲吓有冇人整啲冇咁顯眼，係車隊嘅人先睇到嘅flow-vis?
