ivanliresearch
patreon
11月非常美好，股債皆升。但當然你要一早坐咗上去迎接佢先得。又，到底11月升乜？有冇可能事先知？都難啲。雖然我真係寫明「買啦！仲等？」
🕑 Added 2023-12-04 18:43:28 +0000 UTC回顧美好嘅11月，但你有冇買？冇就唔美好。冇就檢討下
11月 MPF 一舖追返晒之前10個月，夠美好未？
最緊要你有買，仲要買得大，食盡佢
11月頭己同你講「買啦？仲等！」．咁嘅Timing都唔滿意，我都冇計了
點解升？你當然答到我，「炒停加息」。但點解係11月，唔係9月10月？
舊年同今年上半年，可以話詐糊。但今年7月後冇再加，點解11月先炒？
點解停一次加息，唔係「確認」，要停兩次先係？唔知。
一個咁簡單嘅「炒停加息」，都咁難捉幾時開始炒。何況啲百年一遇嘅嘢？
2008年金融海嘯，或者舊年10月，都仲睇到估值平。但2020就冇得咁
當然，亦可以睇VIX，但今次就捉唔到了
咁但，點解11月頭我又有啲信心，覺得「今次真係嚟料？」
其實，都真係睇一樣嘢夠。
呀首先，可以的話，幫手share我個Facebook Page講巴士財技嘅post，唔想share都至少畀個like．冇著數的，但幫朋友，希望啲數字靚啲咁解。
今次呢篇有啲亂，但我覺得幾好的。重點就係諗返：到底有乜方法，可以事先估到11月嘅升勢。即使事後睇都好，有冇蛛絲螞跡睇到？其實都幾難。咁但，當初我又點解覺得「買啦！仲等？」。都分享下
1. 原本想今個月開始，寫少啲連載幾篇甚至十幾篇嘅超長系列。比較想回復返早年寫文嘅方式，短打多啲，貼市啲，寫下個股，或者評下啲newsflow。不過既然有讀者問，就都跟進埋先。
2. 都係延續呢個「減息都係買股票」，可以參考返我明報篇文（attach埋畀你），或者Facebook 嘅埃汾倉11月表現（雖然冇乜特別）。
3. 成個系列就完咗，但補充少少漏咗嘅嘢。另外見12月頭，順手同大家回顧下呢個美好嘅11月。
回顧美好嘅11月，但你有冇買？冇就唔美好。冇就檢討下
4. 但一句：你有冇買？有買先係美好。買股固然好，買債都OK（雖然之後末必太好），上個月都非常好。
11月 MPF 一舖追返晒之前10個月，夠美好未？
5. 明報篇文有寫，成個MPF，之前10個月都累計輸錢，就係11月一次追返晒。因為股債皆升。
6. MPF你一定stay invested，但你自己嘅投資組合，乜都冇買，就唔多美好。
7. 咁你見，埃汾美股倉咪一個月升11%（標普指數9%），唔係話好叻，其實同納指都差不多，你全部科技股可以仲多。但至少跑得贏指數，而我仲要買得大，呢個先係最重要。港股就固然11月都有少少錢賺，但當然今年都係輸錢。至於入面買乜股，上個月先寫過，唔重覆。
最緊要你有買，仲要買得大，食盡佢
8. 點講都好，11月係相當好嘅一個月，但不厭其煩講：最緊要你有買。仲有，係買得大。你10月買夠10萬蚊都好，一個月執1萬，幾好啦，但其實都唔會對你生活有好大分別。
9. 你冇早早買到大份嘅，就食唔盡，又可以檢討下，點解錯過咗？仲等乜？
10. 呢個正係上個月講咗幾次嘅嘢：美股一年就10%左右，但你唔知邊個月度走出嚟。咁你事後睇，梗係timing 重要啦，舊年低位我瞓身借埋孖展買Nvidia幾倍添。都話年年恒指高低位都35%，你捉到幾年已經發達勁過股神。但有幾多人做到？事後話「有指標」睇到嘅，有幾多可以持續到？
11月頭己同你講「買啦？仲等！」．咁嘅Timing都唔滿意，我都冇計了
11. 講多樣嘢，11月頭我就同你講，「買啦？仲等！」，個timing算相當好啦，咁你都唔滿意，我都唔知可以點令你滿意
點解升？你當然答到我，「炒停加息」。但點解係11月，唔係9月10月？
12. 不過事後睇，去到一個月後嘅今日，我問返你，你覺得「點解升」？又或者年尾啲人回顧：「美股年初表現強勁，但到年中表現牛皮，直到11月才因為XXXXXX重拾升勢」，請問呢堆XXXXX，你會填乜？
13. 好易填啫，大家都知，係「憧憬聯儲局減息」。年尾啲人會咁寫，幾年後回顧可能都係咁寫。我亦冇反對，但知唔知問題在邊？
舊年同今年上半年，可以話詐糊。但今年7月後冇再加，點解11月先炒？
14. 問題係，根本過去好多個月，你都可以咁樣估。OK，你可以話之前食詐糊，一路估錯，一路未停，都係事實。好啦，但問返你，就咁憑記憶，你記唔記得聯儲局對上一次加息，係幾時？
15. 我估你未必記得，答案係：7月尾
16. 於是問題就嚟啦喎。舊年，甚至今年上半年，啲人炒「停加息」，你可以話表錯情，一路仲加緊。但，照計7月尾打後，8月9月10月，炒「停加息」，都係「啱」喎，真係停咗嘛。咁但，點解到11月，呢樣嘢先「成真」，市場先忽然會「憧憬停止加息」，忽然會覺得「確認」？
點解停一次加息，唔係「確認」，要停兩次先係？唔知。
17. 用另一個角度問：如果話係「因為停加息」，點解去到11月先升？唔係8月9月10月？明明之前9月嗰次都冇加息，點解要去到10月尾11月嗰次議息，第二次唔加，先係「確認」唔再加？
18. 事後，你可以將11月嘅升勢用「憧憬停加息」去解釋，但點解唔係早兩個月？
19. 長期讀者應該知道答案：答案係，正路，係唔知嘅。
20. 固然我地可以再深入啲睇。你可以話，可能根本唔止係因為「憧憬唔加息」，可能亦因為見到企業盈利OK（我相信都係原因）。又或者可能因為見到通脹真係回落（但，回落咗好耐啦，又係同一個問題：點解回到呢個位先覺得真係回落）。又或者你可以講，因為聯儲局官員的評論 — 但真係咩？上星期鮑威爾先話談論加息言之過早，話仲有可能加息。只係市場懶理，照升，仲有人夾硬話「比想像中鴿」，「佢只係口硬」 — 見到冇？係任你講的。
一個咁簡單嘅「炒停加息」，都咁難捉幾時開始炒。何況啲百年一遇嘅嘢？
21. 你睇，就連一個咁簡單嘅故事，「憧憬停加息」，你都好難捉到點解係11月炒呢樣嘢，之前兩個月又唔會 — 咁其實，面對更多更複雜嘅問題，有啲係前所未見嘅問題（例如疫情），你話要捉到個timing，談何容易？
22. 有人以為我話timing 唔重要，真係澄清返，當然好重要！只係好難捉。況且你仲會捉錯（你見啲人永遠只講捉到時回報幾好，冇人同你講有啲人係摸頂買摸底沽嘅）。
23. 我甚至都未同你講，「聽講10月成班人喺度講地緣政治風險，唔好買股票」
24. 再講一次，事後你睇就易。疫情下因為聯儲局無限QE所以股市好快冇事。2008金融海嘯下因為聯儲局救市所以冇事。但你身處其中，咪見到一日都太長。甚至都未同你計，啲大反彈嘅日子，往往就伴隨住大跌。
2008年金融海嘯，或者舊年10月，都仲睇到估值平。但2020就冇得咁
25. 你話2008金融海嘯嘅情況，或者舊年10月嘅情況，都仲可以睇下估值。之前寫過啦，Facebook去到單位數市盈率。但疫情下2020年3月嗰次，根本你睇估值都唔會覺得極抵（指數高位跌三成之嘛，點會變咗「極抵」？Facebook舊年單位數市盈率嗰個故事中，股價高位跌咗七成）
當然，亦可以睇VIX，但今次就捉唔到了
26. 仲有，以前都寫過下嗰個VIX大法。雖然我好怕人只係想速成，但一句講完就係「VIX 30嗰時你飛入去吧」，咁其實金融海嘯，世紀疫情，甚至舊年年尾嗰次大跌，你都可以捉得到的
27. 但今次就捉唔到了，咁to be fair，今次都只係一個月升9%啫，相當唔錯，但唔係嗰種大V型反彈。
28. 但亦提返你，舊年10月後，VIX就冇再見過30。咁你亦會見到，你一路等，唔知等到幾時，唔知啲嘢升咗幾多。呢個係睇VIX嘅局限。
咁但，點解11月頭我又有啲信心，覺得「今次真係嚟料？」
29. 咁但又強調返，月頭我都寫到明「買啦？仲等！」 — 固然我都唔係極大信心，但都算幾有信心，畢竟你都唔係成日見我會咁講。捉得夠靚啦？
30. 咁我當時係睇乜？其實只係一個月前嘅文，你都可以睇返。
其實，都真係睇一樣嘢夠。
31. 其實，我都係講「炒停加息」，不過點解我比較大信心，相信「今次真係嚟料」？你會見到，我貼過一個咁嘅圖，見到啲美債債息急跌。以前一路有個講法，話債市嘅投資者聰明過股市，好難驗證，但我諗你真係應該多啲留意債市。
32. 正係因為債息急跌，我就相信搏得過。你可以留意兩樣嘢。首先，債息應該真係幾直接影響股市估值。另外，金融海嘯，同埋疫情之下，都見到債息跌到好低。至少事後睇，唔買股票就笨。但當然了，今次10月債息急跌，都仲係4厘樓上。咁你話點解5厘跌到4.7厘我就覺得夠數，唔使等跌到3厘，真係永世答你唔到。但可能係因為債息跌嘅速度都極急。
33. 然後你見到嘅事，就係成個11月，債息都係向下跌嘅，美匯指數亦都係。事後睇，都真係幾簡單。
34. 結論？其實一大堆嘅narrative，真係事後先加上去。你年尾睇回顧，啲人會話你知係因為「炒停加息」甚至「炒減息」，但佢唔會話到你知，點解係11月頭先炒。你每日睇嗰啲咩「市場擔心」「市場預期」，都係話轉就轉。
35. 與其睇呢啲東西，甚至一啲似是而非嘅分析。不如睇啲簡單嘅嘢：就係睇債息，睇美匯指數。呢啲真係夠客觀，冇得呃，而背後全部係真金白銀，唔係「市場評論」咁講完就算。
Comments
十年債息嚟的
想請教下，你睇債息跌果陣你多數會留意咩年期既債息？（見你張圖就 3 個月）
