ivanliresearch
patreon
[年度鉅獻][戲肉] ［美股升完兩成後，下年會發生乜事？］（三）美股升完20%後，下年多數都升，但平均升幅唔高，所以而家值博率不高。咁點應對？另外，仲要記住一樣嘢：美股95年中，趺市只係26次。而升至少20%嘅年份，有34次— 你諗下代表乜？
🕑 Added 2024-01-03 18:41:25 +0000 UTC等咗咁耐，戲肉出場。
美股95年數據。升完兩成後，下年到底會點？
畀晒數據你，唔鍾意95年嘅，自己調節
美股95年歷史，升到20%嘅年份，有幾多？估下？
歷嚟咁多次美股升完20%後，之後一年又有幾多次再升？
係超過一半情況再升。但，「美股係咪都升多跌少架啦」。仲有，升幾多先？
連升兩年20%？都唔少。但跌嘅年份呢？
2024美股好可能回報冇2023咁高。咁但，例如10%回報，搏唔搏得過？
有得升，好似都仲係好。但同「所有年份」比呢？
好啦，似乎而家值博率真係唔高。咁點算？
我地再睇一次，股票真係好東西
股市升嘅年份多過跌，而升時嘅升幅，又多過跌時嘅跌幅
所以，一定要量化。否則就係「有時升有時跌，冇so」
不如，睇埋跌嘅年份又點？有幾多次？
美股95年中，26年趺市。而升20%嘅年份，有34年
美股95年數據。升完兩成後，下年到底會點？
1. 等咗咁耐，戲肉出場。
2. 嚟料，睇數字。奉送Excel一個。入面啲數字邊度嚟？以前個Risk and Return Excel咪有齊囉，畀多一次你。當然冇計2023啦。
3. 呢排我其實整理緊好多呢啲數據，應該好有用，就係早兩篇文講嘅「用嚟駁斥一啲想當然嘅迷思」
4. 又，你自己都可以keep一啲類似嘅嘢，自己做啲分析，一定好過你睇人講。因為你有時今日聽呢個講係咁，聽第個講係咁。佢有冇整錯數你都唔知，即使冇，亦可能演繹唔同。你自己都去做過一次，就冇咁易畀人誤導。
5. 例如今次呢個例子，數字唔難搵，用嘅分析工具亦只係初中數學，亦唔會花你好多時間。
6. 你亦可以參考返我明報同經濟一週嘅文，attach 埋畀你，但幾時都係Patreon最詳細
畀晒數據你，唔鍾意95年嘅，自己調節
7. 就係1928，至到2022年嘅美股回報，同你拎晒出嚟玩。總共95年。唔鍾意咁長？就自己拎返去玩。你話用第啲年份結論唔同？好可能。但記住早排篇文講嘅「蒙地卡羅」，掟飛鏢，你唔好特登搵兩個年份做起始，然後出嚟拗。如果只拎一個起始，拎最長好似最合理。記住，95年
美股95年歷史，升到20%嘅年份，有幾多？估下？
8. 首先畀你估下，95年入面，美股升到20%以上嘅，有幾多年？你估下先
9. 答案係有34年！即係36%，超過三份一嘅年份，回報超過兩成，應該超過好多人嘅估計。只係呢樣嘢，都見到股市係好東西。請你記住呢句嘢
10. 完全詳細數字，Excel入面有晒，我hide咗中間啲行，等張圖唔好太長。你亦可以睇返呢個圖做參考
11. 特別留意，呢34次升超過20%入面，平均同中位數回報31%，最高可以去到53%。升起上嚟，可以好得人驚（當然跌都係，之後講）
12. 咁但戲肉嚟啦喎，之後嘅一年，即係升完20%，之後嗰34年，回報又點呢？有幾多次係再升？你又可以估下。
歷嚟咁多次美股升完20%後，之後一年又有幾多次再升？
13. 答案就係咁：34次「下一年」中，有22次再升，65%情況，好似還好？的確係「多數都再升」（不過留意返：「如果所有年份」呢？陣間講）
係超過一半情況再升。但，「美股係咪都升多跌少架啦」。仲有，升幾多先？
14. 咁平均回報呢？就係9%，中位數就有11.5%。聽落，麻麻地咋喎？亦都所以話，多數都不及上一年（20％）。
連升兩年20%？都唔少。但跌嘅年份呢？
15. 事實上，之後一年再升到20%嘅次數，34次中都有9次，聽落都唔少。但你亦要睇埋跌嘅年份。最差試過之後一年跌35%。固然嗰次係係年代久遠嘅1937年 — 不過第二差，就試過下年跌18%—正係2021年升咗29%後，2022年跌返18%。
16. 其實亦有得解，1937年發生乜事就不深究。但點解2021年狂升，2022年大跌，大家都仲記得好清楚。不外乎都係炒得太癲，估值貴，加埋暴力加息。就見到大升後大跌
17. 咁所以，應該真係睇到，而家值博率唔係太高啦，今年回報好可能會差過2023。咁點算？冇乜點算，根本係平常心，呢啲嘢你改變唔到。2023做得咁好，今年當然好大機會差啲，只係簡單嘅數學—你今期中六合彩四個字，下期就應該只會更少。
2024美股好可能回報冇2023咁高。咁但，例如10%回報，搏唔搏得過？
18. 但另一角度睇，升完20%嘅下一年，65%情況贏錢，平均9%，中位數11.5%，聽落都唔錯？其實係嘅，「幾時股市都係好東西」
有得升，好似都仲係好。但同「所有年份」比呢？
19. 不過記住記住記住，美股就多數時間係升架啦！你計升完20%後嘅一年，又係多數升。你計跌完20%後嘅下一年，亦係多數升。你要同「所有年份」比較下，先知值博率高唔高。
20. 唔知「所有年份」嘅回報的話，我貼一次畀你睇。告誡你：你應該係熟到可以唔睇唔計就大約記得。識呢啲嘢，好過你日日留意啲無聊評論同新聞。呢啲數字夠你受用一生，仲可以反駁好多錯嘅論點。相反，你去研究咩俄羅斯兵變哈馬斯衝突，邊個打邊個，有乜唔同情景，根本嗰個星期後已經冇人再理 — 記住啦，知識係有唔同種類嘅。
21. 你可以開返 risk and return 個Excel，我亦貼過。「所有年份」，股市平均回報11.6%，中位數回報14.2%。提多你一次，「升完20%之後嗰年」，就平均9%，中位數11.5% — 拍埋一睇，係咪見到「升完20%」嘅年份，冇咁值博先！（但講到氣啖都要講：我冇叫你沽晒啲美股！）
22. 你睇贏輸嘅次數，亦見到一樣係咁。「所有年份」，股市73%係升嘅。但「升完20%後嗰年」，就得65%—65%聽落唔低，但真係低過「所有年份」
23. 呢度，已經講咗大半我想講嘅嘢。但你唔止係要知啲數字，仲係學到呢啲思考同分析嘅方法。你話好難咩？根本呢啲數字上網免費搵到，入面涉及嘅「數學」我相信所有讀者都識。問題就係個思考方法。
24. 亦都係因為思考方法，所以我同你寫足三篇前言先貼呢個結論。
好啦，似乎而家值博率真係唔高。咁點算？
25. 結論有咗，咁點部署？最初咪大約講過囉。唔使沽美股！唔使沽！但你成手都係嘅，2024年啲新錢就唔好再買美股，要平衡。相反，你本身冇乜美股嘅，當然可以再買。因為你嘅投資唔只係睇一年！
26. 所以好簡單嘅原理：你嘅投資決定，好受你本身拎住乜影響。所以你不能就咁問我，2024年買美股好唔好。你100%美股嘅，當然唔好。你0%美股嘅，當然好。普通比重嘅？「咁你啲新錢咪部份美股，部份其他嘢，可能60%-70%買其他嘢咁囉」
我地再睇一次，股票真係好東西
27. 剩返啲篇幅講乜？既然整咗啲數，順手同你再溫習一次：股票真係個好東西
28. 「所有年份」嘅，我唔再重覆太多，你自己睇字。記住，平均回報11.6%，中位數回報14.2%，持之以恒，威力好大。
29. 仲有，股市有73%嘅年份係升嘅！升多跌少。更重要嘅係：升就升得多，跌就跌得少。證據？升市年份平均回報，係21%一年。但跌市年份，平均只係跌13.5%一年 — 呢堆「升多贏少，而升時升得多，跌時跌得少」嘅組合結果，就係點解平均回報中位數回報有雙位數一年，然後複利累積落去咁勁。
股市升嘅年份多過跌，而升時嘅升幅，又多過跌時嘅跌幅
30. 想強調一樣嘢：量化！一定要量化！否則你同啲傻仔講，佢同你講「股市係有時升，但有時會跌嘛」「升嗰時係好勁，但跌又可以跌到你血本無歸嘛」 — 見到冇？你冇數字嘅，根本廢話。我有數字嘅，可以完全反駁晒
所以，一定要量化。否則就係「有時升有時跌，冇so」
31. （最後就係迫到啲友講「但過去唔代表將來」— 去到佢講呢句，你知道佢已經完全諗唔到其他嘢講，只能用呢句萬能但最廢嘅解釋。真係有人咁答你嘅，咁你問返佢，「你話股市可以跌好多，都係過去啫，唔代表將來，我話以後年年都升，吹呀？」。睇佢點反駁）
不如，睇埋跌嘅年份又點？有幾多次？
32. 最後我更加想睇嘅係乜？跌嘅年份，列晒出畀嚟畀你。
33. 上面都講咗，73%嘅年份升，即係27%嘅年份跌。就睇你點睇。你問我就真係好值搏，四次先有一次輸。但另一個角度睇，啲人又覺得，「坐四年就會有一年輸錢」。隨你，但三次贏一次輸，已經好夠。何況升嗰時升得多，跌時跌得少。
34. 再睇，跌市嘅年份，平均跌幅13.5%，中位數跌幅9.6%。不過個差異好大。最差，可以一年跌44% — 你話扯，成百年前（1931年），冇可比性。可能係。不過，第二差嘅跌幅，就係2008年，跌37%。留意返，跌咗37%，你係要升返59%先回家 — 現實係，用咗3年時間回家啦。算短定長？答你唔到。覺得3年好長嘅，幫你唔到。不過打後嗰10年美股更勁
美股有95年中，26年趺市。而升20%嘅年份，有34年
35. 呢度我想有一個新角度：你可以將呢啲「跌市嘅年份」，同「升20%嘅年份」比較下。比較乜？上面我地講過，美股有36%嘅年份（34年），升幅超過20%。剛剛又講過，美股跌嘅年份，只係得27%（26年）。
36. 即係點？即係話：美股升20%嘅年份，仲多過錄得任何跌幅嘅年份，聽落真係好到極。所以真係唔好擔心跌市。特別留意：趺嘅年份，平均跌幅13.5%，中位數跌幅9.6% — 但在嗰堆「升20%嘅年份」呢？平均升幅同中位數升幅都大約係31%
37. 31% vs 負9.6%（或負13.5%），相當抵玩。
38. 下篇？又係補充啲其他嘢。同埋我地不如睇定：「如果美股跌，再之後一年會點？」
![[年度鉅獻][戲肉] ［美股升完兩成後，下年會發生乜事？］（三）美股升完20%後，下年多數都升，但平均升幅唔高，所以而家值博率不高。咁點應對？另外，仲要記住一樣嘢：美股95年中，趺市只係26次。而升至少20%嘅年份，有34次— 你諗下代表乜？](https://img10.patrefans.com/storage/1/ne/jx/563145-019e6fb2-2214-7351-8ab5-6d2acf15de81.png)
![[年度鉅獻][戲肉] ［美股升完兩成後，下年會發生乜事？］（三）美股升完20%後，下年多數都升，但平均升幅唔高，所以而家值博率不高。咁點應對？另外，仲要記住一樣嘢：美股95年中，趺市只係26次。而升至少20%嘅年份，有34次— 你諗下代表乜？](https://img10.patrefans.com/storage/7/gn/zc/563145-019e6fb2-2341-7182-aa83-2265a108b975.png)
![[年度鉅獻][戲肉] ［美股升完兩成後，下年會發生乜事？］（三）美股升完20%後，下年多數都升，但平均升幅唔高，所以而家值博率不高。咁點應對？另外，仲要記住一樣嘢：美股95年中，趺市只係26次。而升至少20%嘅年份，有34次— 你諗下代表乜？](https://img10.patrefans.com/storage/5/sh/rh/563145-019e6fb2-234f-7b68-838e-8994ab976191.png)
![[年度鉅獻][戲肉] ［美股升完兩成後，下年會發生乜事？］（三）美股升完20%後，下年多數都升，但平均升幅唔高，所以而家值博率不高。咁點應對？另外，仲要記住一樣嘢：美股95年中，趺市只係26次。而升至少20%嘅年份，有34次— 你諗下代表乜？](https://img5.patrefans.com/storage/9/kd/jl/563145-019e6fb2-2374-7386-b0a2-b18e641c4a02.png)
![[年度鉅獻][戲肉] ［美股升完兩成後，下年會發生乜事？］（三）美股升完20%後，下年多數都升，但平均升幅唔高，所以而家值博率不高。咁點應對？另外，仲要記住一樣嘢：美股95年中，趺市只係26次。而升至少20%嘅年份，有34次— 你諗下代表乜？](https://img5.patrefans.com/storage/4/tp/bv/563145-019e6fb2-2376-70c2-b48c-3ff90410c4b6.png)
Comments
有趣角度，將來寫下
就出
有冇港版😂
美股升完20%之後果年，都要睇非美股表現係咪多數好過美股? 如果唔係, keep 著買美股最簡單?
