ivanliresearch
patreon
2024 買乜股（一）—醜股大翻身。但，首先睇下大市，係咪真係升得多跌，跌得多就升先？畀個scatter plot睇下
🕑 Added 2024-01-08 17:46:15 +0000 UTC投資係「減法」，你要知道「唔係乜」多過「係乜」
2024買乜股？「減法」，唔買美國科技股
咁即係買乜？畀埋啲冧把你
大原則：就睇舊年美股唔掂嗰啲，然後再加啲條件篩選
最好，就唔好揀啲會爆煲，或者會業務大倒退嘅公司。但話咁易咩
講到尾，就係「醜股大翻身」
咁首先再睇下，美股，係咪真係物極必反？換個角度睇
今次又玩scatter plot，睇下「今年」同「下一年」回報，係咩關係？
畀埋啲數字同個Excel你，自己玩都得
Step by Step教埋你點做
出嚟個圖，咁嘅樣，即係點？
好簡單，睇下啲點，係「右上＋左下」多，定「右下＋左上」多
只憑印象，就死得：2008年大跌後2009大升。但打後又9連升
所以，畫條「趨勢線」，幫你Good Fit，睇下咩形狀
預告：遠古年代嘅數字，仲係咪可比？仲有，港股呢？又係咪咁形狀？
投資係「減法」，你要知道「唔係乜」多過「係乜」
1. 幾日冇寫文，上次個「美股一年升咗20%後，下年會點」，真係仲有好多嘢可以玩。重點唔係預測，反正將來好難測，而係背後嘅思考。況且好多時都寫，投資係「減法」，呢個年代大把資訊。你要嘅唔係知道「係乜」，而係要知道「唔係乜」
2. 但上次成個系列嘅結論都好清晰，美股值博率當然低，你見今年開局冇乜力。近排講嘅嘢係就業數字強勁，又好似唔使咁快減息，債息又升返唔少，股市又冇乜運行。又係嗰啲劇本，有排講。不過都留意埋星期四會出通脹數字。
2024買乜股？「減法」，唔買美國科技股
3. 今次呢個系列，就係大家最關心嘅：2024買乜股。畀定結論你都得。咁當然係「非美股」，或者美股入面非科技股嘅嘢。但幾時都係配置，冇人叫你清倉美股，亦唔係叫你完全唔好買，只係新錢嘅比重可以投放多啲落其他嘢。
咁即係買乜？畀埋啲冧把你
4. 照計都呼之欲出啦。美股之中，唔想買科技股嘅。咁你可以睇價值價ETF（IWD）。直頭避開大股嘅，就小型股ETF（VB）。美國市場以外嘅，已發展市場（即係歐洲日本）咪IDEV。只係想新興市場嘅，就EEM。怕中國，想要新興市場走中國嘅，就EMXC。單飛買印度嘅，之前都有文提過，INDY之類。仲敢買中國香港嘅（我都一路有買），咁不外乎都係盈富基金，甚至EWH，MCHI
5. 不過就真係希望講多啲個股。順手一講，有讀者點唱，想我講多啲個股。佢話「反正大家自負盈虧」— 咁真係唔係呢個問題。「自負盈虧就梗架啦」，唔通賠返畀你咩！正如你賺咗錢亦唔會分畀我，幾時都係自己最大責任同功勞，我只係個寫馬經寫波經嘅人。
6. 咁但另一問題，當然係我一路強調「指數為主」，個股就小注怡下情好了
7. Anyway，買乜個股？主要都係睇美股先。你要名嘅，可能去到最後一兩篇先畀你，因為我仲要有個篩選過程，就係呢個系列文做嘅嘢。
大原則：就睇舊年美股唔掂嗰啲，然後再加啲條件篩選
8. 但嚟啦喎：個大原則係，如果睇美股個股，就睇舊年表垷唔好嗰啲！另外，最好揀啲有返咁上下大嘅公司。講到尾，就係最好係啲「盈利OK唔係太差」，只係一時盈利倒退，市場唔炒，或者市盈率收縮嗰啲公司。
9. 就最好唔好揀著啲會成間大倒退，甚至爆煲嘅公司—一般嚟講，似乎大公司呢方面會比較保險啲。雖然，都唔係百份百保證到。
最好，就唔好揀啲會爆煲，或者會業務大倒退嘅公司。但話咁易咩
10. 舉例，麥當勞可口可樂呢啲，或者啲大藥廠，可能各有問題（否則唔會股價落後），但真係底子厚—總唔會成間執笠，或者玩到柯達咁成個業務大倒退。我甚至唔係講Facebook嗰類盈利跌一半嘅公司，嗰啲都係暫時性。係真係成間嘢業務被淘汰嘅公司。
11. 你心諗，鬼唔知唔好揀著啲爆煲公司咩。但真係未必咁易避，個個買嗰時都覺得間公司唔會死架啦。所以即使買個股，我都會叫你分散，會畀幾隻你。
講到尾，就係「醜股大翻身」
12. 呢種「揀股方法」，其實幾好，快靚正。講到尾就係「醜股大翻身」，之前升得多嘅今年應唔掂，之後跌得多嘅今年可能翻生。固然，永遠冇「保證」，所以唔使同我講「有啲公司跌足幾年」，當然大把。亦有啲公司升完一倍又一倍，亦係大把。
13. 「所以咪叫你買多啲指數」，但你又話想聽個股嘛。「咁當然就係2022年尾買Nvidia 同Facebook」（咪講笑，咪同上面嘅哲學一樣），但你又話升咗。咁而家，咪唯有睇啲可能未升，只係未炒到，或者盈利暫時唔係好得嘅公司。
14. 而呢種想法，背後嘅理念，其實同成個「美股升完20%後，下年會點？」一樣。唔知大家睇完一輪，有冇得到任何嘢。
咁首先再睇下，美股，係咪真係物極必反？換個角度睇
15. 但嗰堆文其中一個成日強調嘅東西係：「物極必反」「鐘擺」。亦即係，好似升得多就跌，跌得多就升。我成個系列都係講呢樣嘢啫，係咪？
16. 我地今次再睇多啲，到底係咪真係咁。另外，除咗大市，之後亦睇下個股係咪咁（提示：其實只要「大市」係咁，咁一般「個股」都會係一樣，至少大公司係。因為「大市」，咪就係一堆個股囉。好難有啲規律在「大市」好明顯，但去到個股就冇晒）
17. 上次嘅文，我用咗唔少數字玩法。例如睇下，美股跌完嘅年份，之後一年，果然平均回報好似好過「所有年份」喎，甚至贏率都可能高啲，咁就證明咗真係跌時應該買，亦見到真係「物極必反」，見到真係「鐘擺」，見到跌得多就傾向升返。同樣道理，我同你睇咗，歷史上升完20%。下一年嘅回報，就好似不及「所有年份」咁。亦係講到同一樣嘢。
18. 今次作為introduction，同你玩樣嘢，就係我Facebook Page好鍾意貼嘅scatter plot（呢度都有玩過）。
今次又玩scatter plot，睇下「今年」同「下一年」回報，係咩關係？
19. 聽英文名好似好深，其實只係將兩組數字，放去x軸y軸，睇下個相關性。經濟好係咪股市好？放晒兩組數睇咪知。球會有錢係咪成績好啲？一樣。恒指入面，係咪大公司表現好過細公司？又係咁玩。
20. 咁今次嘅玩法，不如我地就將美股，「自己同自己玩」。即係點？即係我做兩組數。一組係「今年回報」，一組係「下年回報」，睇下出嚟個圖，會係點。
畀埋啲數字同個Excel你，自己玩都得
21. 呢啲東西最開心係乜？最開心係你可以自己做。數字？上網一搵就用，再唔係我嘅Risk and Return Excel都有（今年目標係整多啲呢類嘅Excel Database）。
22. 至於軟件？你開個Excel就得。知識要求？近乎冇。我係由101教起嘅。
23. 如果本身數理經濟底嘅讀者，應該知道，呢類東西應該做「Time Series Analysis」好啲，但唔搞咁多嘢了，得少數讀者先明嘅嘢，我係唔會寫嘅
Step by Step教埋你點做
24. 實際上非常簡單，我有齊美股每年嘅回報，然後加一個新嘅 column，放「下一年」嘅回報。就係上面咁嘅嘢。然後，「第一年」嘅數放x軸，「第二年」嘅數放y軸，你在Excel整個scatter plot，搞掂。
出嚟個圖，咁嘅樣，即係點？
25. 出嚟，就係一個咁嘅圖。例如左下角最低嗰粒，就係「第一年跌完25.1%，下年再跌43.8%」，就係1930同1931年嘅事。費事個圖咁花，我冇label啲點嘅年份，但你開個Excel自然對得返
26. 然後又點？教你最簡單咁睇呢啲圖。
好簡單，睇下啲點，係「右上＋左下」多，定「右下＋左上」多
27. 如果「今年」同「下年」係正相關嘅，即係升開繼續升嘅，跌開繼續跌嘅。咁你應該見到啲點，集中在右上同左下兩格。因為右上就係「升，再升」，左下就係「跌，再跌」（呢個，亦即係「趨勢派」）
28. 如果唔係咁嘅，如果「今年」同「下年」負相關嘅，即係升完多數跌，跌完多數升嘅。咁你會見到啲點，集中在右下（即係升完，下年跌），同埋左上（即係跌完，下年升）。呢個就係「物極必反派」
只憑印象，就死得：2008年大跌後2009大升。但打後又9連升
29. 記住，你冇數字，只憑印象，只係講你記得嘅年份，就死得。完全唔科學。舉例？我可以同你講，2008年大跌，然後2009年大升。2022年大跌，2023年大升，仲唔係負相關？但你又可以駁我，「2009至2017年9連升呀！」，仲唔係正相關？
30. 呢啲拗法，咪就係浪費人生。你見平時啲人討論嘅，好多都係呢啲垃圾。講到尾，拎晒啲數出嚟貼個圖，一目了然。固然「過去未必代表將來」，但有啲講法根本過去都係錯嘅，就更加可以不理。
31. 好啦，但你就咁睇，其實都未必即時睇到，到底啲點在「右上＋左下」多啲，定係在「右下＋左上」多啲。況且，除咗數點嘅數目，仲要睇埋啲數字大細（詳情不解）
所以，畫條「趨勢線」，幫你Good Fit，睇下咩形狀
32. 咁點？好簡單，揀條「趨勢線」，Excel自動幫你。如果多數係「右上＋左下」，條線就會係「／」咁嘅樣，upward sloping，上斜，positive slope．如果多數係「右下＋左上」嘅，咁條線就係「＼」咁嘅樣，downward sloping，落斜，negative slope
33. 成件事最偉大，就係我教你只係數點點認形狀，乜數學都唔使用。
34. 貼多次。畫出嚟，見到了。條線，「近乎係平嘅」，即係其實關係唔係好大。不過認真睇，見到其實係：右下左上，略為downward sloping的。
35. 所以？咪之前同你講咗。係比較傾向「物極必反」，有一定負相關 — 雖然唔係好強，但呢個效應一定強過「升開繼續升」
36. 原因？咪又係估值。同埋人性，greed and fear，升就多數overshoot，點都係玩到泡沫。跌又係跌過頭，去到極殘。所以，慢慢就會回歸返去中間。
37. 亦大約係因為呢種現象，所以先去睇「醜股大翻身」。
預告：遠古年代嘅數字，仲係咪可比？仲有，港股呢？又係咪咁形狀？
38. 呢個圖可以好多玩法。不過在你問問題前，我話定你知下一篇會寫乜：下一篇我會同你睇—遠古年代嘅數字，仲係咪有意思？如果我只係近幾十年，個圖又係咪唔同。
39. 仲有，今次你就應該問：「咁港股呢？港股有冇呢個現象」—你心諗，4連跌啦喎，仲唔係跌開有條路？咁但，如果只係咁諗，咪又係偏差囉，之前嘅年份呢？都係量化做下出嚟好啲。仲有，港股你一樣可以問，幾十年前嘅數，同而家仲可唔可比。畢竟你睇過去二三十年，港股嘅「結構性轉變」，明顯大過美股。
40. 其實呢啲東西，你自己整個圖出嚟都知，但我地即管下篇再睇下。
Comments
類似，1月15日篇文講
Mater
醜股翻身最貼切嘅策略算唔算係狗股？睇返歷年嘅業績（例如SDOG）又好似真係唔算太差
照計炒預期，舊年升晒了
請問2024減息應該對科技股好，為何提示不買科技股，定或是這個減息預期已經在2023年尾price in咗？謝指教🙏
