55 Bar
patreon
日記～2021年5月18日～回信
🕑 Added 2025-03-30 12:45:41 +0000 UTC星期二 晴 間中密雲
如常早起，6點就醒左，係其他監獄/懲教所都係 morning call 大廣播，而赤柱就係由職員過來開燈。6點未有燈，仲有半個鐘，但係窗外就已經有陽光射入來，雖然個窗細到約A3咁上下，陽光就係一個咁細而有幾條鐵柱嘅窗射入來，而個窗差不多有二米高。而這個細窗就係同鐵門對面，而鐵門就有兩個更細嘅窗作對流，可想而知，間囚室到底有幾熱。
出倉/早飯，返到期數Workshop，又到派信時間，果然今日收到勁多信，因為由四月尾，去了小欖二星期，跟住又去了赤柱，啲信寄去石壁再轉去小欖，當信去到小欖，人已經去了赤柱，所以又要派去赤柱，結果要成個月遊車河嘅信，今日終於收到一部份，成個多月都無收過信。有一封很厚，當然應該結他譜。而知道我去了赤柱，而直接寄來赤柱比我嘅人，就係我前公會“自由工作者服務公會”的秘書“薄餅小姐”，而並非家人或石牆花的筆友。很多囚友都收到信，大家都第一時間睇信。信是囚友的精神食糧。
睇完信大家都忙住即刻回信，可惜在工場能夠寫信的地方不多，其實明天係公眾假期，剛好今日收到大量新歌譜，明天有得玩。最可惜，仲未批到我可以玩結他，真係好在囚友會借比我玩。現在已經五月，尚有四個月就放學，時間不多了，快些批個結他我玩啦！
天氣好熱好焗，而且密雲，可能會落雨，大家又到放風時間，去到球場打排球。晚飯後，返房整理歌譜，冇漿糊，帶左飯返房做漿糊，因為有啲歌要兩張紙，所以cut完再貼成一張紙係最好。監獄就係多時間，就係咁無聊，在牆外根本無必要無時間咁做！.
Comments
Wai Tong Tze
💪
