55 Bar
patreon
日記～5月23日 ～ 職工盟工會探訪（鎖住結他）
🕑 Added 2025-06-01 02:24:01 +0000 UTC星期日 晴（勁晒）
天氣太熱，個倉入面就好像焗爐一樣，昨晚醒左好多次，但每次都好快訓得返。大約六點就醒左，今日係大衛Day 即係星期日休息日，一早就出左球場先，好猛太陽，只好揾個陰涼處寫信吧，太熱唔想做運動啦！一共有六封信要回，一小時放風時間就寫好晒啲信，明日星期一，有一封免費信可以寄，所以會有好多人寄信，太陽之下，無一位囚友去打波，全部都係休息傾計。夠鐘了，就去飯堂食早飯，因為每個飯堂都有沖涼房，大家食完飯就去沖涼！
食完飯，就有職員來帶我地去攞結他，今日終於我可以去攞，原來有一間房，好多Locker 每個櫃有兩層，每個locker鎖住三個結他，講自己囚號，職員就開某個locker 被你攞返自己個結他出來，之後職員就鎖返，每個期數只能攞三個結他去玩！
原來調音器都要輪住用，一個期數用完到另一個期數用。調完音就留係飯堂玩一日，而飯堂有架，每個囚友有一個架用來放物件，我就放啲洗頭水皂液及毛巾。玩吓結他唱吓歌，又到食包妹（粥），逢星期日，係食腐竹煲粥，勁難食，我星期日係唔食呢啲粥，只係食半塊面包就算。大家一齊唱吓歌，全部係我彈，因為佢地唔識。
過左一陣，妹妹同Pizza 阿Tom 今日來拜山（探訪），Pizza 係公會的秘書，Tom 係新加入工會的人，入學前我加入了職工盟的“香港自由工作者服務工會”，原本有意做第一屆會長，但要入學只好交托他人，（工會日後發生太多事，日後再寫）。
探訪嘅事交比妹妹負責安排，6月8日到珍姐及其他義工探監師來探我。返到飯堂，派完藥，便繼續玩結他。差不多食飯，就要收結他，同攞結他一樣，職員會帶住你去鎖返好就返飯堂食飯。飯後，又收到風，明日又有人要過界，即要調去其他監獄，所以話唔好亂借嘢比人，隨時乜都無晒，正如我都有一本書留左係石壁。我應該無咁大影響力啩，同我最Fd兩個，明天要調去石壁，所以話，係監獄今朝唔知夜晚事，千變萬化。飯後返倉，原來我要調倉，由73號調去對面11號，終於可以開個氣窗，同比出面嘅風扇吹到正，個倉比之前涼好多！
Comments
Wai Tong Tze
💪
