55 Bar
patreon
日記～30/05/2021 ～ 劃非
🕑 Added 2025-08-30 09:18:58 +0000 UTC星期日 晴 29° ～31°
昨晚醒左好多次，太熱了，只好邊聽住收音機，一邊訓教啦！早上6:30起左身，今日星期日（大偉Day）一出倉就去左做運動先，個新來嘅越南仔傾左一陣，佢用緊有的英文加身體語言去溝通一吓，知到佢來歷多左。
係球場都拉吓肋，深蹲吓跳兩吓就算。返到飯堂又有兩個新人來左，一個桂支一個ON（桂支等於香港人），終於又升級啦！已經升到乜都唔使做！食完午飯，問ON 借個結他玩，因為佢地攞左結他出來都唔係玩，雖然結他啲聲唔太好，總好過無得玩，練吓幾個新chord，同啲新人吹吓水，個越南仔唔識講比較難溝通。決定劃非1,000 八件煙分兩個月，每月都係500加自己糧，應該好好用。
晚飯後，又調房，因為赤柱正在維修，在每一個房間安裝一部風機仔，所以調動比較頻密。調房首先要還原間房，而去到新房又要清潔一翻！原來新房收唔到收音機，大獲啦！我今晚買左嘅蛋撻同錫蘭茶去左邊？好在突然有囚友送過來，今晚有蛋撻食。
PS: 蛋撻/魚柳包/奶茶/錫蘭等等，都係職員收買B仔物品，通常有四個庒（主要職員）所以B 仔每日有四份呢啲下午茶，懲教署默許。而B 仔就會用十非煙賣比囚友，從而賺錢。所以人地劃非，就係用1,000 叫家人在外存入B 仔戶口，B 仔收到就會比十件煙你，咁叫劃非。收到煙就可以買到蛋撻奶茶或廚房加餸
